Dantzan.com blog komunitatea

Sortu blog berria   Sar zaitez blogera

2014/02/18 15:54:51.978749 GMT+1

Koko-dantzak 2014: Mandiola eta Agina aldean ibiliko gara

Larunbat honetan, otsailaren 22an aterako gara koko-dantzan eta koko-eskean. Aurten Mandiola osatzeko falta zaizkigun 4 baserri eta Agina aldekoak bisitatuko ditugu.

Koko-eskearen ibilbidea

Goizean goiz, 8:30ean, Merkatu plazan egingo du lehen agerraldia koko-dantzen konpartsak. Ondoren bi taldetan banatuko gara. Talde bat Mandiola aldera eta bestea Aginaga aldera joango da. Amañatik gora Zozola, Zozolabarri, Aritxuluetabarri eta Aritxuluetara igoko gara. Bitartean bigarren taldea Ixuatik Agina aldera jaisten eskuin eta ezker dauden baserrietara hurbilduko da: Altzerreka, San Roman, Aboagaazpikoa, Aboagainekoa, Torrepe... Mandiola aldeko taldeak hango lanak bukatuta Aginakoarekin elkartuko da, eta hortik aurrera batera egingo ditugu Suinagatxo, Suinaga, Gorostiaga, Atxekoa, Orbesoaren eta Aginagainekoa. Hortik gora segi eta Oregizahar, Arandoaurtena, Arandobarrena, Arandoguena eta Arandoetxebarrirekin bukatuko dugu.

2010-02-06_Koko-dantzak-IZ-1goa_4533

Koko-festa kalean

Iluntzean, 19.00etan Anbulategiko parkean elkartuko gara koko-konpartsa eta koko-festan parte hartu nahi duten guztiak, eta Mauxitxa txarangaren doinura erdiko kaleetan ibiliko gara. Ekitaldi irekia da hau eta nahi duten guztiak daude gonbidatuta, koko-jantzi eta festan gurekin batera parte hartzera.

Koko-dantzak 2014

8:30 Merkatu plazan lehen agerraldia
9:00 – 18:00 Koko-dantzak eta koko-eskea Agina aldeko baserrietan.
19:00-21:00 Toribio Etxebarria, Untzaga eta Kalbeton kaleetan koko-dantzak Mauxitxarekin.

Zozolako oroitzapen bereziak

Koko-dantzetan zenbait bisitari izan ditugu urteotan, tartean argazkilariak eta folklore ikertzaileak ere. 2010. urtean, aurtengo ibilbide bera egin genuenean Antxon Agirre Sorondo folklorista ezaguna izan genuen behatzaile. Gehienek nor ze ezagutu ez, eta harriduraz begiratzen zioten bati eta besteari aginduak ematen zizkion gizon handi hari. Zozola baserrian lehen agerraldia egiten ari ginela, ezkontza argazkilariak bezala, erretratua ongi egiteko bakoitza non jarri behar zen agintzen hasi baizitzaigun Antxon Agirre Sorondo.

2010-02-06_Koko-dantzak-IZ-1goa_4244

"Zorionak! Bai inauteri ederra!" esan zigun Antxonek eta gu ur bitsetan, hainbeste inauteri eta festa ezagututako gizonaren ahotik zorionak jasota. Gero bi gauza agindu zizkigun: "Etorriko naiz beste batean!". Eta "Hemendik urtebetera artikulua argitaratuko dut El Diario Vascon, koko-dantzen berri emanez" iragarrita agurtu gintuen. Ez genuen pentsatzen urtebetera akordatuko zenik, baina esandako hitz bete zuen, eta horrela, 2011ko otsailaren 19an argitaratu zuen artikulua: "Koko-inauteria". 

Orain hiru aste hil da Antxon Agirre Sorondo, eta beraz, bigarren agindua bete ezinda joan zaigu. Eta gauzak zer diren, Zozola baserriko Jose Enrike hil da egun horietan bertan. Bisita berezia izango dugu beraz Zozolara aurten, etxeko Jose Enrike eta han bertan ezagutzera eman zitzaigun Antxon gogoan izateko unea izango baita.

Nork: kezka.2014/02/18 15:54:51.978749 GMT+1
Etiketak: eibar aginaga mandiola koko-dantzak koko-eskea 2014 | Permalink | Erantzunak (1) | Errenferentziak: (0)

2014/01/24 11:49:42.535406 GMT+1

Iruñeko Baluarten dantzatuko dugu Besta Berri otsailaren 1ean

Datorren otsailaren1ean, Iruñean, Baluarten dantzatuko dugu Argia dantzari taldearen eta Juan Antonio Urbeltzen Besta Berri ikuskizunarekin. Duguna, Argia, Maritzuli, Haritz, Urki, Arkaitz, Xinkako, Gure-Kai eta Kezka dantza taldeetako 100 dantzari, musikari eta laguntzaileren artean egiten dugu Besta Berri. Horrelako talde zabala koordinatu eta bakoitza, dagokion unean dagokion tokian izatea bakarrik milagro txiki bat izaten da, bakar bakarrik parte hartzaile guztien inplikaziotik lortzen dena.

Operak, orkestrak eta sona handiko ekitaldiak ageri dira Baluarteko programan, eta Eibarko dantzariok pozik egingo ditugu bertan gure dantzak, Arrateko ezpata-dantza tarteko, beste batzuetan gure herriko auzoetan (Santa Kurutzen edo Goimendin, adibidez) dantzatzen dugun ilusio berarekin.

 

Nork: kezka.2014/01/24 11:49:42.535406 GMT+1
Etiketak: 2014 besta-berri iruñea argia | Permalink | Erantzunak (0) | Errenferentziak: (0)

2014/01/02 16:26:22.572064 GMT+1

Besta Berri Gasteizen eta Iruñean datozen asteotan

Urte berria estreinatu eta baditugu zenbait emanaldi datozen asteotan. Larunbat honetan, urtarrilak 4, Gasteizen, Principal Antzokian (20:30) eskainiko dugu Juan Antonio Urbeltz eta Argia dantzari taldearen Besta Berri ikuskizuna.

Otsailaren 1ean berriz, (larunbata, 20:00) Iruñean, Baluarten izango gara. Lehen aldia izango da Baluarteko eszenatokia zapalduko dugula, eta Besta Berri berezia izango da, Aunitz Urtez-erako prestatutako Iruñea eta Arrateko ezpata-dantzen sinbiosia errepikatuko baitugu bertan.

Nork: kezka.2014/01/02 16:26:22.572064 GMT+1
Etiketak: 2014 besta-berri iruñea argia gasteiz | Permalink | Erantzunak (0) | Errenferentziak: (0)

2013/12/02 17:04:53.930613 GMT+1

Haritzeko lagunekin 40. urteurrena ospatzen

Gogotsu geunden Haritzekoek luzatutako gonbite hartan parte hartzeko: 40 urte dantza taldea sortu zela. Hauek ere hamaika izango dituzte kontatzeko...eta izan ditzatela, dantzatzeko! Azkenengo hotz eta euriek ez zuten Haritzeko lagunek antolatua zuten festara hutsik egin nahi izan eta, plazan aurreikusia zegoen dantza jaialdia Herriko Antzokira eraman beharra izan zen. Txukun antolatu gintuzten Haritzeko lagunek han batu ginen ehundik gora dantzari eta musikariok. Oinetakoak aldatzeko faltan, dantzarako prest elkartu ginen denok eguerdirako Herriko Antzokian. Ikusleak berriz besaulkietan, epel epel, jaialdi harek emango zuenaren zain.

Gure-kaiko dantzariek eman zioten hasiera jaialdiari San Roke eguneko dantzekin. Segidan Iruñeko Duguna taldeak egin zuen salto agertokira Nafarroako dantza sortarekin, eta jarraian Kezkako 22 dantzariok Arrateko Amaren ezpata-dantza dantzatu genuen gure txistularien doinura. Atzetik etorri ziren gero Galdakaoko Andramarikoen indarra eta bizitasuna dantzari-dantza eta erromerietan, Donostiako Argiakoen dotorezia jauzi eta sokadantzan eta Portugaleteko Elai-Alaikoen berritasun eta koreografiak Zuberotarren azalean sartuta. Publikoak ere baiezkoan gaude baina, dantzariok behintzat, seguru, gozatu ederra hartu genuen elkarrengandik. Familia erretrato koloretsu batekin eman genion azkena dantza saioari.

2013-11-23_Haritz-40-urte-jaialdia_2225_IZ 2013-11-23_Haritz-40-urte-jaialdia_2291_IZ 2013-11-23_Haritz-40-urte-jaialdia_2443_IZ 2013-11-23_Haritz-40-urte-jaialdia_2586_IZ 2013-11-23_Haritz-40-urte-jaialdia_2653_IZ 2013-11-23_Haritz-40-urte-jaialdia_2772_IZ

Dantzen atzetik, bestela izan ezin ez zitekeen bezela, dutxatu eta kaleko erropa epelak jantzita, Ikastolako frontoiara zuzendu ginen parte hartzaile guztiok lagun arteko bazkariaz gozatzeko. Haritzeko dantzari eta lagunek jardun zuten zerbitzari lanetan, eta kafeak oraindik atera gabe zeudela, hemengo eta hango musikariak segituan hasi ziren frontoia berotzeko lanetan aulkietatik jendea altsa eraziz. Halaxe, giro polit eta batez ere, lagun artekoan, joan zen Haritz Euskal Dantzari Taldekoen 40. urteurrena. Ea luze gabe berriz denok elkar ikusteko aitzakia dugun, dantzan eta giro goxoan, beste 40 urte itxaron beharrik gabe!

2013-11-23_Haritz-40-urte-jaialdia_2840_IZ

Nork: kezka.2013/12/02 17:04:53.930613 GMT+1
Etiketak: duguna elai-alai elgoibar haritz gure-kai 40 andramari argia kezka urteurrena | Permalink | Erantzunak (0) | Errenferentziak: (0)

2013/11/25 16:03:36.793488 GMT+1

Besta Berri Zornotza eta Andoainen

Ia urte bete pasa da joan den urteko abenduan, Bilboko Arriagan, Juan Antonio Urbeltzen zuzendaritzapean eta Argia, Duguna, Haritz, Maritzuli, Xinkako eta Kezkako dantzarion parte hartzearekin. Denboralditxoa generaman berriz ikuskizuna taularatu gabe, maiatzaren 18an Euskal Jaien bueltan Eibarren bertan eman genuenetik hain zuzen ere. Eta orain berriz, denbora gutxian, apenas jantziak gainetik kendu eta garbitzeko astirik izan dugu: Zornotzan lehenengo urriaren 26an eta, hamabost egun geroago, Andoainen, azaroaren 9an.

2013-11-08_Besta-Berri_Andoain_IMG_1338_IZ

Udako oporretatik bueltan, Arrate eta Iruñeko ezpata-dantzen saioak atzean laga ostean ekin genien etxeko prestaketa laneri. Besta Berrin tokatzen zaizkigun konpromisoak behar den bezela bete ahal izateko gure gazteenak hutsuneak betetzera sartuak ziren ikuskizunean eta haiek ere fin hartu zituzten egin behar berriak. Zornotzarako eguna gerturatu ahala, aurreko asteburuetan partaide guztiak elkartuta hautsak kendu genizkien jantzi eta dantzeri Donostian izandako saioetan.

2013-11-08_Besta-Berri_Andoain_IMG_1413_IZ

Eguna iritsita ohi bezela azken orduko errepasoa egin genuen lekua hartu eta dudak uxatzeko. Frontoian zen Zornotzakoa, balioaniztun eraikina, baina honek sarritan berarekin dakarren hoztasunetik at, txukun antolatuak ziren eszena atzekalde eta aldatzeko lekuak. Dantzariok eskertu genuen lekua izatea, bertatik bertara, erropa aldaketak azkar egin eta dena ere behar den bezela antolatua izateko.

2013-11-08_Besta-Berri_Andoain_IMG_1677_IZ

Lehen aldia zutenen urduritasunek markatu zuten ikuskizuna, berritasunak. Beldurrak beldur ederto joan zen emanaldia; barrutik hala igarri genuen eta kanpotik begira izan genituenek ere hala adierazi ziguten. Dutxak, materiala jaso eta pozik egindako lanaz etxera, hurrengora arte.

2013-11-08_Besta-Berri_Andoain_IMG_1738_IZ

Hamabost egun beranduago Andoainen genuen topagunea berriz ere. Zornotzako entsegua eta gero, betiko ikutuez gain, geneukanarekin atera ginen agertokira. Egindakoetatik saiorik txukunena eman ez genuela jakinda ere, jendearen txalo zaparrada beroa jaso genuen eta horretxekin aurtengoz agur esan genion Besta Berriri. Hurrengoko zita urtarrilaren 4an, Gasteizen, gabon zaharretako nagiak eta gehiegikeriak gainetik kendu eta 2014. urte berriari ongi etorria egiteko. Zer hoberik dantzan hastea baino!

2013-11-08_Besta-Berri_Andoain_IMG_1890_IZ

Nork: kezka.2013/11/25 16:03:36.793488 GMT+1
Etiketak: zornotza besta-berri andoain urbeltz 2013 kezka | Permalink | Erantzunak (4) | Errenferentziak: (0)

2013/11/07 12:29:28.842285 GMT+1

Dantza Coliseoan: Ertza: Act of God

Ertza: Act of God

2013ko azaroak 15, ostirala, 20:30etan

Juan Sebastian Bach-en musika darabil Asier Zabaletak lan honetan sinesmen erlijiosoei buruzko gogoeta egiteko. Dantzaren plazer fisiko eta estetikoaz haratago, dantza gogoetarako tresna moduan darabil Ertza konpainiak.

Harkaitz Canok hitzen bidez adierazitako kezkei ematen die segida Asier Zabaletak dantzaren bidez: "Jainkoa gure arduretatik ihes egiteko asmakizun bat al da? Edo askatasunari diogun izua arintzeko adoptatzen dugun modua da?"

ACT OF GOD, Ertza

Argazkia: Gorka Bravo CC-BY-SA

Lau dantzarik gorpuzten eta dantzatzen dute Act of God: Eneko Gil, Lorentxa Iturralde, Noemi Viana eta Asier Zabaleta berak. Ander Lipus-en laguntza izan dute dramaturgian, eta Harkaitz Canok idatzi ditu testuak. 

Ertza: Act of God
2013ko azaroak 15, ostirala, 20:30ean
Eibar, Coliseo antzokia
Sarrera: 8 € (internet bidez erosteko hemen)

jj

Nork: kezka.2013/11/07 12:29:28.842285 GMT+1
Etiketak: eibar act-of-god dantza-coliseoan asier-zabaleta coliseo ertza 2013 | Permalink | Erantzunak (0) | Errenferentziak: (0)

2013/10/29 14:29:29.538620 GMT+2

Arrateko dantzak Iruñean leku eginez

Iruñeko Duguna taldeko lagunek, Aldapako San Ferminen ezpata-dantza plazaratu zutela bosgarren urtea betetzen zela eta, gurekin batera ospatu nahi izan zuten seinalatutako asteburuan bertara dantzara gonbidatuaz. Bigarrenez irailean Arrate egunez egin beharreko lanak eskaintzeko aukera izan genuen Nafarroako hiriburuan.

Larunbat bazkalostean, Iruñera iristeaz batera, euriak jaso gintuen, gogotsu. Eguraldiak onera egingo zuelako esperantzarekin eta ordutegiarekin genuen marjina tarteko aurreikusitakoarekin aurrera jarraitzea erabaki genuen. Dugunakoek Arrotxapean erabiltzen duten eskolapioen eskolan batu eta beharrezko agindu eta argibideak eman eta gero segituan ginen erropa zuriak janzten; ostegunean Donostian Gipuzkoako urrezko dominaren ekitaldian erabili ostean, ez zuten lan makala hartu Arantzak eta Maikak erropak plantxatzen berriz luzitzeko eran izan gintezen!

Atertu ostean, eta kaleak lehortzen joan zitezen astia ematen zezan, ekitaldia ordu bete atzeratzea erabaki zen. Prest ginen seiak ingururako baina kaleak oraindik ere busti-busti eginda zeudenez, abarketak eskuan hartuta urreratu ginen Maiatzaren 2an Dugunak duen egoitzara. Kaleko oinetakoak lanerako abarketengatik aldatu eta, Oier Araolaza buru zela, zazpiak puntuan ekin genion kalejirari. Enrike Montero eta Ainara Ibañez txistuekin eta Iñaki Barua atabalarekin talde buru genituela lan berezia izan genuen Iruñeko alde zaharreko kaleeten tragoa eskuan zuela zebilen jende andanaren artean bidea zabaldu eta udaletxe plazara iristen. Ikusleak ala ikusgarriak, nork ote zuen harridura aurpegi haundiagoa ez dakigu!

2013-09-28_Irunea-ezpata-dantza_0311_IZ

Plazan ginela, ezpata-dantzarekin hasi orduko, erropen zuritasunak eta iriarena doinuak erakarrita segituan inguratu gintuzten iruindarrek. Arrateko ezpata-dantza lehenengo eta trokeo dantzak atzetik, betiko ahaleginak egin genituen saioa txukun joan zedin. Jendearen txaloek gure eginahalak gozotu ostean, erretiratu eta berriz oinetakoak aldatu aurretik, familia argazkia egin genuen udaletxe parean.

2013-09-28_Irunea-ezpata-dantza_0407_IZ 2013-09-28_Irunea-ezpata-dantza_0530_IZ

Dutxa eta gazteenen atontze lan sakonen ostean, afaria zain genuen Dugunakoen egoitzan. Beraiek egin zituzten zerbitzari lanak eta giro ezin hobean joan zitzaigun afalordua. Gero gerokoak izan ziren alde zaharreko kaleetan eta berandu gabe Arrotxapeako eskolapioetan zain genuen hotel inprobisatura erretiratu ginen lotara.

Igande goizez, asteburuko eguraldi totelak nahikoa eutsi zion eta Aldapako San Ferminen ezpata-dantza ederraz gozatzeko parada izan genuen; jendez gainezka zeuden kaleetan barrena lehehengo eta udaletxe plazan ekitaldi buruan. Dantzak bukatuta, bazkari kontuak Iruñean bertan egin genituen, autobusa hartu eta berriz etxera bueltatu aurretik.

Bukatu aurretik, eskerrik asko eta zorionik beroenak Dugunako lagun taldeari zuen artean halako modu adeitsuan leku egitearren. Nahi duzuen arte!

[Hemen Iñaki Zugastik ateratako argazki gehiago]

Nork: kezka.2013/10/29 14:29:29.538620 GMT+2
Etiketak: trokeo-dantza iruñea arrate 2013 ezpata-dantza | Permalink | Erantzunak (1) | Errenferentziak: (0)

2013/10/04 07:11:57.540054 GMT+2

Ostarteak zabalak dira gero Arrate gainean

10:55 Argazkia egiteko ordua dugu. Dantzari gehienak prest daude. Iñaki eta Felipe, argazkilariak udalekuko terrazako atean daude. Kezkatuta begiratzen dute kalera. Euri fin eta itsaskorrak dirau, azken orduetan bezala. Kalabobos famatua. Eta ez du trazarik atertzeko. Erabakiak hartzeko unea da. Arriskatu egingo gara, ez zaigu beste irtenbiderik okurritzen. Aulkiak prestatu eta dantzariak antolatzen hasi gara. Nahikoa burukomin izan dugu dantzari guztiak argazki kameren objetibo txikietan kabitu ahal izaten. 64 dantzari argazkirako antolatu nahian, ez gara euriaz gehiago akordatu. Ez eta beharrik ere. Ostartea zabaldu baita dantzariak argitara atera ahala. Lotsati lehenengo, lotsagabe ondoren, eguzkitsu azkenerako. Ostarteak zabalak dira gero Arrate gainean!

2013-09-08_Arrate-eguna-IMG_9095_IZ

Argazkia bukatu eta urteroko sesioa. Eliza barrura ezpata-dantzaren barruko ala kanpoko lerroak tokatzen ote diren. Aurten barrukoak sartu dira. Datorren urtean akordatzen ez bagara, aber hemen begiratzeaz gogoratzen garen. Hamaiketako meza nagusian, konsagrazioaren ondoren sartu ohi gara eliza barrura. Altxatu du gora Xabier parrokoak ostia eta prestatu ditugu barruko bi lerroak. Ezpatak altxatu eta zubiak egiteko uneak "emozio" fuerteak izaten ditu berarekin. Jendea gain-gainean, eta ezpatak trabesean, indarka, batera eta bestera... halako batean "Kristoren odola" eta "eliztarren batena" elkartuko zaizkigu...

2013-09-08_Arrate-eguna-IMG_9109_IZ

Prozesio motza

Gurutzerako bidea lokaztuta zegoela eta, prozesioa elizaren inguruan egingo dela abisatu digute. Pena hartu dugu, polita izaten baita basoko ezpata-dantza. Asfalto garbian azkar egin dugu buelta, eta elizako atarian Ama Birjinaren aurrean dantzatu dugu Arrateko ezpata-dantza.

2013-09-08_Arrate-eguna-IMG_9174_AU 2013-09-08_Arrate-Eguna_FL_9841

Aurtengo lau bakarlariek bezperan ere dantzatu arren ez dute neke trazarik. Beasaingoak ditugu laurak: Nerea Mendizabala, Jaione Barandiaran eta Izaskun Salazar dira aurtengo hiru gonbidatuak, eta haiekin da, laukotea osatzen eta aitaponteko lanak eginez, Mikel Sarriegi. 

2013-09-08_Arrate-eguna-IMG_9239_AU

Arrateko zelaiko floridadia?

Zelaiko lokatzean nekez aurki daiteke belar arrastorik. Azken bi egunetako euriek eta bezperako festak berde aztarnarik gabe utzi du zelaia (?), eta gosetutako basurde saldoak baino basa handiagoa utzi du. Olazabalen caddiea bezala ibili gara, greeen-eko egoera aztertzen, eta azkenean ezpata-dantza eta trokeo-dantzak probalekuan, harri gainean egitea erabaki dugu.

2013-09-08_Arrate-Eguna_FL_9940

Usartzako txistulariak ederki asko entzun ditugu aurten, soinu ekipo txukuna eta txosna guneko altabozekin lotura jarri baititu Udalak. Lejardik ur botilak ekarri dizkigu, eta aitzakiarik ez dago beraz dantzari ekiteko. Bi parrilla osatu ditugu ezpata-dantzan eta onenak eman ditugu trokeo-dantzetan. Beasaingo dantzariek Goierriko urratsekin loratutako zortziko ederrak dantzatu dituzte, eta ezpata-dantza berriz osatuta egin dugu erretreta, zerua eguzkitsu eta dantzariok irripartsu.

2013-09-08_Arrate-eguna-IMG_9276_IZ 2013-09-08_Arrate-Eguna_FL_10018 2013-09-08_Arrate-Eguna_FL_10118 2013-09-08_Arrate-Eguna_FL_10148 2013-09-08_Arrate-Eguna_FL_10175 2013-09-08_Arrate-Eguna_FL_10286

Honen bestez, eskerrik asko kofrade lagun zaituztegun guztiori. Datorren urtean berriz hitzordua Arrate gainean, astelehenez, aste barruko zereginek uzten diguten einean. Gu hasiak gara abarketa berriak erosteko aurrezten!

2013-09-08_Arrate-eguna-IMG_9598_AU

Hemen Iñaki Zugastik eta Felipe Loyolak egindako argazki sorta:

Nork: kezka.2013/10/04 07:11:57.540054 GMT+2
Etiketak: kronika tokian-tokikoa trokeo-dantzak ezpata-dantza arrate 2013 | Permalink | Erantzunak (0) | Errenferentziak: (0)

2013/10/03 12:26:19.848269 GMT+2

Dantza Coliseoan: Aracaladanza: Constelaciones

Aracaladanza: Constelaciones

2013ko urriak 5, larunbata, 17:00etan

Margolari koloretsu eta irudimentsu batek inspiratutako ikuskizunarekin dator oraingoan Aracaladanza konpainia. Joan Miro-ren mundu koloretsu eta jostalariak goitik behera bustitako dantza ikuskizuna da Constelaciones. Irudimena errealitatea eraldatzeko tresna boteretsua dela sinesten du Aracaladanzak eta Joan Miroren irudimen harrigarria dantzan jarri du oraingoan.

Enrique Cabrerak sortu zuen 1994. urtean Aracaladanza konpainia, eta ordutik dantza eta arte eszenikoen alorrean erreferentzia saihestezina bihurtu da konpainia honen lana. Heldu, gazte zein umeentzat egindako lanek arrakastaz bete dituzte mundu osoko antzokiak. 2011an Aracaladanzaren Nubes ikusgarria izan genuen Eibarren, eta liluratuta atera ziren emanaldira hurbildutakoak. 

Aracaladanza: Constelaciones

  • Zuzendaria: Enrique Cabrera
  • Koreografia: Aracaladanza
  • Dantzariak: Carolina Arija Gallardo, Jorge Brea Salgueiro, Raquel de la Plaza, Jonatan de Luis, Jimena Trueba Toca.
  • Musika: Mariano Lozano P. Ramos, Luis Miguel Cobo.
  • Jantziak: Elisa Sanz
  • Eszenografia eta atrezzoa: Elisa Sanz / Ricardo Vergne

Iraupena: 50 minutu.


Aracaladanza: Constelaciones
2013ko urriak 5, larunbata, 17:00etan
Eibar, Coliseo antzokia
Sarrera: 8 

Nork: kezka.2013/10/03 12:26:19.848269 GMT+2
Etiketak: dantza-coliseoan coliseo eibar 2013 aracaladanza | Permalink | Erantzunak (0) | Errenferentziak: (0)

2013/09/27 13:23:0.820187 GMT+2

Arrateko dantzak Iruñera

Bihar, irailak 28, Iruñean izango da Kezka dantza taldea Arrateko dantzak eskaintzen. Duguna dantza taldeak Aldapako San Ferminen ezpata-dantza plazaratu zuela bosgarren urtea betetzen da, eta hori ospatzeko zenbait ekitaldi antolatu dituzte beraien ezpata-dantzarekin batera. Horien artean gara geu, eta pozik eta urduri izango gara Iruñean, Arrateko ezpata-dantza eta trokeo-dantzarekin.

2012-09-08_Arrate-IZ__0199

San Fermin txikiko jaiak dira Iruñean, eta goizean dantzarien topaketa eta igandean Aldapako San Ferminen ezpata-dantza, ez dugu erronka makala oraingoan Iruñea zaharrean. 18:00etan abiatuko gara Alde Zaharreko kaleetan barrena, eta 18:30etan eskainiko dugu emanaldia Udaletxe plazan.

Iganderarte geratu eta San Fermin Aldapakoaren dantzak ikusteko aukera izango dugu biharamunean.

Nork: kezka.2013/09/27 13:23:0.820187 GMT+2
Etiketak: trokeo-dantza ezpata-dantza arrate iruñea 2013 kezka | Permalink | Erantzunak (0) | Errenferentziak: (0)

Kontagailua: | Ikusi estatistika osoak