DUGUNA DANTZA TALDEA

Bosniako bidaia - aurrerapena

duguna — Tue, 31 Aug 2010 09:51:20 +0200

Abuztuan Bosnia aldean izan gara dantzan, Bijeljina herriko ""Rhythm of Europe" jaialdian, hain zuzen. Ez genuen nahi bezainbat dantzatu, emanaldi gutxiko jaialdia izan baita, baina bidaiak izan ditu bere alde aberasgarriak.

Mezu honetan, jaialdiko ardurardunek haien webgunean eskegitako zenbait argazki. Laster helduko dira gureak!

Antolatzaileek igotako argazki guztiak, hemen.

Tuterako festetan

duguna — Mon, 02 Aug 2010 11:37:37 +0200

Santiago egunez ezin izan ginen Elizondora joan, Tuteran baikenuen dantzarako zita. Aurten, laugarrenez, bertako Beterrik peñak gonbidatuta erriberako hiriburuko festetan izan ginen dantzan eta musika jotzen, arratsaldez.

Zenbait ingurutxo, jota, porrusalda eta jauzi dantzatu genituen hainbat plazatan eta tuterarrak ere animatu ziren gurekin dantzan egitera. Ordu t'erdiz ibili ginen karrikaz-karrika eta azkenerako motz egin zitzaigun egun horretako jarduna.

Tuterarren harrera, beti bezala, bikaina izan zen eta ia heldu den urtean ere bueltatzeko aukera dugun!

Tuterako emanaldiko argazki sorta hemen.

2010eko San Ferminen kronika

duguna — Fri, 30 Jul 2010 12:17:53 +0200

Badira egun batzuk iruindarron urtean bitan zatitzen duten festak amaitu zirela eta indarrak berreskuratu ditugun heinean, horien berri emanen dugu hurrengo lerrootan.

Uztailak 6. Iruñerriko dantza talde guztion emanaldia Foruen plazan

Urtero bezala, Foruen plazako emanaldiarekin eman genion hasiera festei. Talde guztiek Agintariena egin ostean, neskek Ziekoko dantzak egin zituzten, mutilek Gipuzkoako uztai-txikiena eta brokel-makilena eta denok elkarrekin Zangozako jota. Ondotik, Larrain-dantza irekia jo zuten gaiteroek nahi zuen guztiak dantza zezan.

Uztailaren 6ko argazki sorta hemen.

Uztailak 7, San Fermin

Jaiak gogoz hartzen ditugu eta gogorra izaten da 6tik 7rako transizioa. Goizean-goiz, entzierroaren orduan-edo, geratzen gara arropaz aldatzeko eta normalean, dantzariak fresko samar agertzen dira. Uztailaren 7an Aritz Ibañez izan zen buruzagia eta Iñaki Sagardoi bandedaria. Prozesioa goizeko 10:30etan hasi eta 14:30ak inguruan bukatu genuen. Ibili ostean, dantzatzeko garaia ere heldu zitzaigun. Aurten Argia dantzari taldeko maisuekin errepasoa eman genion Iribasko ingurutxoari eta zenbait aldaketa egin genituen eta horixe plazaratu genuen uztailaren 7ko eguerdian, udal plazan.

Uztailaren 7ko argazki sorta hemen.

Uztailak 10, Iruñeko erraldoiak gurean dantzan

Benetako ohorea da guretako urtero-urtero Iruñeko erraldoi eta kilikien konpartsaren bisita jasotzea. Aurten, uztailaren 10ean egin ziguten bisita, hain zuzen ere konpartsaren egunean eta gure egoitzako atean egin zuten dantzan. Trukean meloi eta edari freskoak atera genizkien, egarria baretzeko. Erraldoien eta buruhandien konpartsak 150. urteurrena egiten du aurten eta hemendik zorionik beroena opa nahi dizkiogu!

Uztailaren 10eko argazki sorta, hemen

Eta ia konturatu gabe, eta kasik gogo apur batekin ere bai, heldu zen uztailaren 14a, San Ferminen zortziurrenaren eguna. Berriz ere prozesioan parte hartu genuen (eskerrak 7koa baino azkoz motzagoa den). Hasier Moreno izan zen buruzagia honako honetan eta Iñigo Gartzia banderaria.

Prozesioaren ostean 6 dantzarik kilikiekin dantzatu zuten "La Dominguera": Leire Leza, Amaia Irigoien, Ainara Ranera, Izaskun Arriaran, Rakel Gartzia eta Itziar Perez-ek.

Ondotik, ohi dugunez, Larrain-dantza egin genuen Iruñeko gaiteroen doinuek lagunduta.

Uztailaren 14ko argazki sorta, hemen

Taldeari dagozkion lan hauetaz gain, erraldoiak dantzatzen, erraldoiek dantza dezaten musika jartzen (gaitak, txistuak eta danborrak), uztailaren 7an bertan behera geratutako txistu eta gaita dantzaldi inprobisatuan jotzen, txistulari alardean dantzan eta jotzen... aritu dira taldeko zenbait dantzari eta musikari.

Txirrin-txanketan min dugu hanketan. Sendatuko zaigu heldu den urteko San Ferminetan!

Bi emanaldi batean

duguna — Fri, 02 Jul 2010 11:37:43 +0200

Udarekin batera heldu zaizkigu emanaldi andana. Txikien taldeak gehiago izan ditu nagusienak baino. Ekainaren 26an ordean, biek izan genuen emanaldia 3 orduko tartean.

Txikiek goizeko 11:30etan dantzatu egin zuten Errotxapeako merkatarien elkarteak antolatuta. 40 bat minutuko emanaldia eman zuten San Ferminetako beroketa gisa.

Hona hemen emanaldiko zenbait argazki.

Emanaldiko argazki guztiak hemen.

Taldeko nagusiek berriz emanaldia izan zuten Iruñea ondoko Olatz herrian, bertako jaien karietara. Eguerdi aldean, eguzkipean egin genuen dantzan. Giro ederra, baina bero handiegia aukeran.

Neskek eman zioten hasiera emanaldiari Nesken esku-dantzarekin. Gipuzkoako nesken soka-dantzen dokumentazioari eta zenbait adibideei errepasotxoa eman eta gure bertsioa atondu dugu aurtengo. Bertan, zenbait doinu-zahar, 2/4ko eta 5/8ko zortzikoak egin zituzten gure neskek eta jota eta porrusaldarekin amaitu zuten.

Mutilek Gipuzkoako brokel-dantzako bi dantza eskaini zituzten. Makil-handiena eta Uztai-txikiena.

Jaurrietako Axuri-beltzaren ostean, Zuberoako Maskaradetako dantzekin eman genion amaiera emanaldiari, izerdi patsetan.

Aitor Razkinek ateratako argazki sorta hemen.

Hurrengo zita, San Ferminetan!!!!!!

Dantzari txikien eguna Berriozarren

duguna — Tue, 22 Jun 2010 12:30:29 +0200

Ekainaren 6an egin zuten Berriozar-en, Berriobeitin eta Xulapainen 2010eko Nafarroako dantzari txikien eguna.

Gure taldeko dantzari txikiak eta musikariak ere bertan izan ziren. Nafarroako Euskal Dantzarien Biltzarrak egun horretako zenbait argazki sareratu ditu bere Flickr kontuan eta hemen dituzue ikusgai.

Ezpalak 2010. Iruñeko emanaldiaren kronika

duguna — Tue, 01 Jun 2010 13:30:10 +0200

Aurten behintzat eguraldiaren aitzakiarik ez genuela izanen argi geratu zen goiz samarretik. Alde zaharraren eguna ospatzen zen gainera Iruñean eta giroa ere ziurtatuta zegoen. Dantzari eta musikarien lana baino ez zen falta.

Ordu batak inguruan hasi ziren heltzen Luzaide, Donostia, Baztan, Ossau, Lapurdi eta Bizkaiko lagunak. Bazkaldu ondotik, 5:30etan ekin genion lanari, alde zaharretik egindako kalejirarekin. 6:00etan eman genion hasiera emanaldiari.

Dantzan lehenak etxekoak izan ginen. Duguna dantza taldeko txikiek Hegi egin zuten eta nagusiek (eta hare nagusiagoek), Ainhoarrak.

Argia dantzari taldeko dantza-maisuen txanda heldu zen ondotik. 60. hamarkadan iparraldeko hainbat bazterretan ibili ziren bertako dantzak ikasten, baita Zuberoan ere, eta bertako maneran eskaini zizkiguten Aitzina-pika eta Ostalertsa, Juan Antonio Urbeltz buru zutela, Jexux Larreak, Fernando Aristizabal-ek eta Claude Iruretagoienak. Marian Arregik eta Mikel Urbeltz-ek jarrio zioten doinua bi jauzi horiei.

Donostiatik berriz ere jauzi (eta hiru!) egin genuen Nafarroa aldera, Baztanera hain zuzen. Bertatik etorri zitzaizkigun Baztandarrak izeneko taldea, Javier eta Patxi Larralde txistulari eta dantza maisuek gidatuta. Dantza-jauzien sisteman berean sar ditzakegun mutil-dantzak eskaini zizkigute haiek. Aunitz-urtez, Zazpi-jauzi zaharra, Muxikoak eta Baztango zortzikoa eskaini zituzten eta pilatu ziren ikusleen txalo zaparradaren babesean utzi zuten plaza.

Nafarroatik irte gabe, baina ekialderuntz joz, Luzaideko Bolantak etorri zitzaizkigun ondotik. Haien jantzi koloredun eta musika alaiarekin berriz ere txalo zaparrada atera zieten ikusleei. Euskaldunak, Sorginak, Hegi, Marianak eta 2. eta 4. Kontra-dantzak egin zituzten Luzaidar dantzari gazteek.

Euskal Herritik aldentzeko garaia heldu zen orduan, baina ez sobera. Frantziako Ossau haraneko Laruns herritik dantzari eta musikari talde jatorra heldu zitzaigun. Beren dantzak eta doinuak ikusi eta entzuterakoan jabetu ahal izan ginen, haien dantzek gureekin dituzten antzekotasunez. Haien dantzak Sauts Basques deitzen ez dituzte ba! La Crabo (ahuntxa), Le Munein (Moneinak) eta Le Moutchicou (Muxikoak) eman zituzten haien emanaldian.

Biarritz-etik heldu zitzaigun Maritzuli konpainia. Bere buru Claude Iruretagoiena dantza-jauzien inguruan gaur egun dagoen espezialista handienetakoa da. Maritzuli konpainiak aurkeztu duen azken ikuskizunean, Aurrez aurre izenekoan, jauziak dantzatzeko zeuden estilo desberdinak bildu ditu eta horiekin batera, dantza-jauziak desafio joko moduan dantzatzeko zegoen ohituran oinarrituta errekreazioak egin ditu, eta hori bera erakutsi zuten Iruñeko emanaldian. Azkaindarrak eta segidak (Lakartarrak eta Ahuntxa) eman zituzten haien saioan, Aiko taldearen musikaren doinupean.

Bukatzear geunden (nahi baino gehiago luzatu zitzaigun saioa ordurako), baina akitu aitzin, dantzakera ezberdinak elkarrekin erakusteko saiakera egin genuen dantza talde ezberdinetako dantzariek. Esaterako, Amikuzeko Gabota eta Muxikoak dantzatu genituen Maritzuliko eta Dugunako dantzariek batera.

Baztandarrek eta Dugunakook berriz, Añoar-ttipiak izeneko jauzia eman genuen mutil-dantza eta jauzi gisan aldi berean.

Dantza taldeon emanaldia amaituta, ikusleen artean zeuden dantzarien txanda heldu zen, izan ere, Aiko taldeko lagunen eskutik dantzaldi irekia izan baikeguen postrea! Mutil-dantzak (Larraldetarrek emanak), jauziak eta jota, porru eta arrimatekoren batekin amaiera eman genion Iruñeko jardunaldiari.

Mikel Irure dantzari-argazkilariak ateratako argazki sorta hemen.

Ezpalak jaialdia asteburuan

duguna — Fri, 28 May 2010 10:27:59 +0200

Asteburuan eginen dugu Ezpalak dantza tradizionalen nazioarteko jaialdiaren 5. edizioa, Iruñean eta Eibar-en. Ezpata-dantzak izan ziren lehenbizi (Eibar-en) eta gerora (Eibar eta Iruñean) Makila-dantzak, Arku-dantzak, eta Karaktere-dantzak heldu dira. Aurten, jakina denez, Dantza-jauziak izanen dira protagonista.

Eibarko Kezka-dantza taldearekin batera antolatzen dugu Ezpalak jaialdia eta aurten larunbatean Iruñean izanen da eta Igandean Eibarren, beraz. Maritzuli konpainia, Argia dantzari taldea, Baztandarrak, Biarnoko Ossau bailarako musikari eta dantzariak, Luzaideko Bolantak eta Aiko taldea izango dira Iruñeko jaialdian, Duguna-rekin batera.

Taldeen emanaldia bukatuta dantzaldi irekia izanen da Aiko taldearekin.

Ezpalak dantza-jauzien jaialdiaren egitaraua

Maiatzak 29, larunbata, Iruñea

17:30 Kalejira alde zaharreko karriketan barna

18:00 Ezpalak, dantza-jauzien nazioarteko jaialdia Burgoen plazan. Euskal Herriko eta atzerriko dantzen erakustaldia:

Duguna dantza taldea – Iruñea (Nafarroa)
Baztandarrak – Baztan (Nafarroa)
Osseau haraneko musika eta dantza – Osseau (Biarno)
Luzaideko bolant-dantzariak – Luzaide (Nafarroa)
Argia dantzari taldea – Donostia (Gipuzkoa)
Maritzuli konpainia – Baiona (Lapurdi)

Segidan: Dantzaldi irekia Aiko taldearekin. Danza-jauzien inguruan prestatu duen Urraska CD-Liburuaren aurrerapena egingo du Aikok.

Maiatzak 30, igandea, Eibar (Eibarko Euskal Jaiaren baitan)

12:30 Ezpalak, dantza-jauzien nazioarteko jaialdia Untzaga plazan. Euskal Herriko eta atzerriko dantzen erakustaldia:

Kezka dantza taldea – Eibar (Gipuzkoa)
Baztandarrak – Baztan (Nafarroa)
Osseau haraneko musika eta dantza – Osseau (Biarno)
Argia dantzari taldea – Donostia (Gipuzkoa)
Maritzuli konpainia – Baiona (Lapurdi)

Segidan: Dantzaldi irekia Aiko taldearekin. Danza-jauzien inguruan prestatu duen Urraska CD-Liburuaren aurrerapena egingo du Aikok.

17:00etan Erromeria Aiko taldearekin.

Jaietan giro: Festen dantzan

duguna — Tue, 18 May 2010 09:37:25 +0200

Aurreko larunbatean karrikaratu zuen Berria-k udaberrioro argitaratzen duen "Jaietan giro" gehigarria. Bertan Euskal Herriko jaietan hemendik-hara ari daitezkeen musika talde, dantza talde, bertsolari eta enparauei buruzko informazioa eman ohi dute.

Duela Pare bat aste Joxi Ubeda kazetariaren deia jaso genuen eta gure taldeari buruz zerbait karrikaratu nahi zutela esan zigun. Urtero jarri izan dugu iragarki bat gehigarri horretan eta akaso horregatik.

Kontua da larunbatean Berria zabaldu genuenean sorpresa galanta hartu genuela, portadan ere atera gintuztela ikusita. Barruko artikuloa ere oso zuzena, beste batzuetan (beste hedabide batzuetan) argitaratu dizkiguten hanka sartzerik gabe!

Beraz, mila esker Berriakoei!

Axeri-boda bigarrengoz Iruñean

duguna — Wed, 12 May 2010 01:16:40 +0200

Paz Ziganda eta San Fermin ikastolen 40. urteurrenaren karietara dantzatu genuen apirilaren 24ean Axeri-boda ikuskizuna Iruñeko Gaiarre antzokian.

Berezia izaten da etxean dantza egitea eta ikusleak ia hasieratik gogotsu badaude, zer esanik ez! Disfrutatu ere disfrutatu genuen dantzan, Argia, Kezka eta Haritz-eko lagunekin batera.

Eguerdian egin genuen dantza (ez da ohikoena izaten) eta bazkariarekin jarri genion ginda egunari!

Mikel Irurek ateratako argazki sorta hemen.

Axeri-Boda Iruñean

duguna — Fri, 23 Apr 2010 09:05:41 +0200

Bigarren aldiz emanen dugu bihar (apirilak 24) Axeri-Boda ikuskizuna Iruñean. Gaiarre antzokian izanen da eguerdiko 12:30etatik aurrera, San Fermin eta Paz Ziganda ikastolen 40. urteurrenaren karietara.

Juan Antonio Urbeltzek zuzendutako ikuskizunean, Argia, Haritz, Kezka eta Dugunako dantzari eta musikariak arituko gara. Sarrerak salgai daude San Fermin eta Paz Ziganda ikastoletan bertan.