Dantzan.com blog komunitatea

Sortu blog berria   Sar zaitez blogera

2014/04/11 13:24:56.233569 GMT+2

Zamaltzaina eta Lajkonika Krakovian

"Lajkonik mundua, zaldikoaren mundua" erakusketa inauguratu zen 2014ko martxoaren 31an Krakoviako Historia Museoan. Erakusketaren inaugurazio ekitaldian Krakovia bertako Lajkonik-en, Zywiec herriko maskaradako Konik (zaldiko) eta Zuberoako zamaltzaina, horien segizioak eta dantzen agerraldia burutu zen. Zamaltzainaren parte hartzea zutenak Kezka, Haritz, Maritzuli eta Argia taldeetako dantzariek egin zituzten.

Hona hemen Kezka dantza taldeak prestatutako kronika eta bideo erreportaia: 

Zamaltzaina eta Lajkonika. Krakovia, 2014-03-31. Argazkia: Iñaki Zugasti - CC-BY-SA

Nork: Haritz.2014/04/11 13:24:56.233569 GMT+2
Etiketak: | Permalink | Erantzunak (0) | Errenferentziak: (0)

2014/01/27 16:04:22.645138 GMT+1

Besta Berri Iruñeako Baluarten

Urte hasieran egin genuen bezala (urtarrileran 4ean Gasteizko Printzipal Antzokian) Juan Antonio Urbeltz eta Argia dantza taldearen Besta Berri ikuskizuna taularatuko dugu larunbat honetan, otsailak 1 Iruñeako Baluarten arratsaldeko 20:00etan.

Baluarten dantzatuko dugun lehen aldia izango da, eta Haritzekoekin batera, Duguna, Argia, Maritzuli, Urki, Arkaitz, Xinkako, Gure-Kai eta Kezka dantza taldeetako 100 dantzari, musikari eta laguntzaile arituko dira.

  • 2014ko otailaren 1ean (larunbata), arratsaldeko 20:00etan Baluarten

Nork: Haritz.2014/01/27 16:04:22.645138 GMT+1
Etiketak: | Permalink | Erantzunak (0) | Errenferentziak: (0)

2013/12/17 13:28:5.048718 GMT+1

Buruko zapia minutu batean

Pentsatu dugu interesekoa izan daitekeela ondorengo gida hau. Ohikoa da data hauetan jantzi tradizionalez janztea. Eta gona edo prakak bezain garrantzitsua da, buruko zapia. Askotan galdetu izan digute buruko zapia nola jartzen den. Hori dela eta, hona hemen bideo tutorial laburra minutu bakarrean. Honako hau, zapia jartzeko dauden modu desberdinen artetik bat da.  

Bideoa: dantzan.com

Aldiz, denbora gehiago izanez gero, eta beste zenbait zalantza argitzeko asmotan, hona hemen buruko zapiaz gain, abarkak edota gerrikoa nola jarri ikasteko gida luzetxoagoa:

Bideoa: Aitor Lauzirika

Nork: Haritz.2013/12/17 13:28:5.048718 GMT+1
Etiketak: | Permalink | Erantzunak (0) | Errenferentziak: (0)

2013/12/12 09:43:55.702124 GMT+1

Altzola dantzan

Elgoibarko Ongarri argazkilari taldeak "Altzola gogoratzen" argazki erakusketa jarri zuen martxan abenduaren 4ean Elgoibarko Kultur Etxean. Elgoibarko Altzola auzoari eskainitako erakusketa Elgoibarko Udalaren eta Jose Luis Urbietaren laguntzarekin antolatu da. Azken honek batutako 100 bat argazki zahar jarri dituzte ikusgai eta abenduaren 14ean itxiko dute erakusketa.

Guk, ondorengo bi argazki hauek ekarri nahi izan ditugu blogera. Izan ere dantzako argazkiak dira eta argi eta garbi ikus dezakegu garai batean erromeria ederrak egiten zirela Altzolan, baita soka-dantza ere.

Lehenengo argazkian, gazte batzuk soka-dantzan ageri dira.

Bigarren argazkian Rosendo ageri da dantzan. Argazkia, 1944ko San Juanetako erromeriakoa da. Argazkiari begiratuz gero, Ignacio Irusta ere ikusi daiteke ezkerraldean eta honen ondoan, txapela eta zigarroarekin, Jose Garate "Plazahoerrota", azkenik, argazkiaren eskuineko barrenean txapelarekin Pedro Apraiz.

San Juan festak indar handia izan dute beti Altzolan. Resureccion Maria Azkuek zenbait dantza doinu bildu zituen Altzolan XX. mende hasieran. Besteak beste, Errosarioko Amaren ezpata-dantzan erabiltzen dugun "Dantzatu daigun sonbraillu".

Nork: Haritz.2013/12/12 09:43:55.702124 GMT+1
Etiketak: | Permalink | Erantzunak (0) | Errenferentziak: (0)

2013/11/26 10:01:42.838161 GMT+1

Lagun arteko ospakizuna

Eguraldiak lagundu ez arren, aurpegi ona jarri eta Haritz dantza taldearen 40. urteurrena Elgoibarko Herriko Antzokian ospatu genuen. Talde lagunek ez ziguten hutsik egin, eta gainera sekulako maila erakutsi zuten oholtza gainean.

Aurrez jakinarazi genuen bezala, Debako Gure Kai dantza taldekoek, Debako San Roke dantza eta Jorrai dantza taularatu zituzten.

Ondoren Nafarroara salto egin genuen, eta Iruñeako Duguna taldekoek Nafarroako dantzak erakutsi zizkiguten.

Berriro Gipuzkoara bueltatu eta aspaldiko lagunak diren Eibarko Kezka taldekoek, Arrateko Amaren ezpata-dantza ekarri zuten gurera.

Galdakaoko Andra Mari dantza taldea izan zen laugarren talde gonbidatua Bizkaiko dantzak oholtza gainean erakutsiz.

Ondoren, Donostiako Argia dantza taldekoak izan genituen gurekin pare bat jauzi eta Galaiena rdantzatzen.

Azkenik, Portugaleteko Elai Alai dantza taldeak, Zuberoako dantza desberdinak eskeini zizkiguten.

Amaieran taldeko argazki ederra egin eta dantza talde guztiak elkarrekin bazkaltzera joan ginen  Ikastolako frontoira. Musika eta dantza ez ziren falta izan bazkalostekoan.

Egun oso ederra igaro genuen eta  bertara gerturatutako guztiak eta etorritako talde guztiak eskertu nahi ditugu, hain jaialdi polita egitearren.

Nork: Haritz.2013/11/26 10:01:42.838161 GMT+1
Etiketak: | Permalink | Erantzunak (0) | Errenferentziak: (0)

2013/11/13 09:57:56.101471 GMT+1

40 urte lagunekin dantzan

Urte osoa daramagu Haritz dantza taldearen 40.urteurrena ospatzeko ekintzak antolatzen. Urtero, dantza taldeak izaten dituen konpromezuez gain, pintzelada bereziez marraztu nahi izan dugu urtea. Horregatik, besteak beste, urtarrilean, Oier Araolaza ekarri genuen mozorroen inguruan hitz egiteko. Otsailean, Eibarko Kezka dantza taldeak, inauterietan ateratzen dituen Koko-dantzak ekarri genituen Elgoibarko kaleetara. Apirilean, Elgoibarko Izarrarekin elkarlanean, Zuberoako Maskaradak ikustera joateko irteera antolatu genuen. Abuztuan, Elgoibarko jaiekin batera, Iñaki San Martin "Soarte" argazkilariaren "Apur batean soka-dantza" erakusketa ikusgai egon zen Elgoibarko Kultur Etxean. Eta urteari amaiera eman eta borobiltzeko, dantza jaialdi bat antolatu nahi izan dugu. 

Jaialdia, datorren azaroaren 23an, larunbata izango da. Ospakizun honetan, 6 dantza taldek hartuko dute parte. Oraingoan Haritzekoek abarketak kenduko ditugu, eta ikusle izatera pasako gara, horrela, Euskal Herriko txoko desberdinetatik datozen 6 dantza talderi Elgoibarko oholtza eskaintzeko. Haritzen 40 urte hauetan, gurekin harreman gehien izan duten dantza taldeak gonbidatu nahi izan ditugu gurera. Hasteko etxetik gertu dauden lagunak, Eibarko Kezka dantza taldea eta Debako Gure Kai dantza taldeak.

Eibarko Kezka dantza taldea. Argazkia: Iñaki Zugast

Debako Gure Kai dantza taldea. Argazkia: Dantzan.com

Donostiatik, Argia dantza taldea etorriko da, guretzat, erreferentziazko taldea inondik inora.

Donostiako Argia dantza taldea. Argazkia: Iñaki Zugast

Bizkaitik Portugaleteko Elai Alai eta Galdakaoko Andra Mari dantza taldeak etorriko dira. Biak ere Haritzen bidean lagun izan ditugu.

Portugaleteko Elai Alai dantza taldea. Argazkia: Iker Garaizabal

Galdakaoko Andra Mari dantza taldea. Argazkia: Iñaki Zugasti

Azkenik, Nafarroatik, gonbidatutako talde lagunetatik berriena, Iruñeako Duguna dantza taldea. 

Iruñeako Duguna dantza taldea. Argazkia: Duguna dantza taldea

Haritzen 40. urteurren ospakizunekin amaitzeko jaialdi hau, Kalegoen plazan izango da eguerdiko 12:00etan, beti ere eguraldiak laguntzen badu. Euria eginez gero, jaialdia Herriko Antzokian egingo genuke.

Jaialdia hasi aurretik, eta zerura lasai begiratu ahal badugu behintzat, kalejira bat egingo dute parte hartuko duten dantza talde guztiek Elgoibarko kaleetan zehar, 12:00etan Kalegoen plazan amaitzeko. 

Gurekin batera, Haritz dantza taldearen 40.urteurrena ospatzeko gonbitea luzatu nahi dizuegu guztioi. Puntako taldeak ekarri ditugu zuentzat, helburu dugulako, herri honek dantzaz gozatzea!

Nork: Haritz.2013/11/13 09:57:56.101471 GMT+1
Etiketak: | Permalink | Erantzunak (0) | Errenferentziak: (0)

2013/10/02 16:19:25.213012 GMT+2

Errosarioko Amaren ezpata-dantza bostgarrenez

Badator konturatzerako urriko lehen igandea, heltzear da, bere Errosarioko Amaren ezpata-dantza eta guzti. Egun berezia guretzat beti, baina aurtengoan bereizgarri egiten duten bi ezaugarrirekin. Etendako kate bati lotu gintzaizkion Errosarioko Amaren ezpata-dantza berreskuratu genuenean, baina pixkanaka badihardugu geuk ere bidea egiten. Bosgarrenez aterako gara alde zaharreko kale estuak musika eta dantzaz jantziz. Gainera, Haritz Dantza Taldearen berrogei urteurrena ere ospatzen dihardugularik, aitzakia bikaina iruditu zaigu ospakizunetarako eta atzerabegirakoetarako dugun behar natural hori askatzeko.

Ohiko lau ezpata-txikien ordez zortzi dantzari izango ditugu lehenengoz, eta Haritzen luzaroan zuten onena emanaz jardun duten kideak omentzeko baliatuko dugu aukera. Lau hamarkadatako historiak askorako emango luke, ezin zerrendatu denbora horretan etxe honetatik pasa diren dantzari, musikari eta laguntzaile guztiak. Muga hori bitarte, honakoak izango dira parte hartuko duten dantzariak, gure historiaren adierazgarri eta kide izan ditugun guztien ordezkari: Ainhoa Larrañaga, Nerea Lariz, Unai Froilan, Imanol Santos, Mikel Legorburu, Abel Iriondo, Lurdes Odriozola eta Jon Lizarralde.

Gainontzean, taldea ondorendoek osatuko dute: zerbitzari lanetan Maialen Astigarraga arituko da, eta Buruzagia, Jokin Salegi izango da. Ezpata luzeen taldea, ondorengo dantzariez osatuko da: Amaia Loiola, Jael Lizundia, Izaskun de Marcos, Mikel Olaizola, Josu Espilla, Gorane Ayesta, Haritz ARrieta, Haizea Rumayor, Kristina Martin, Sergio Agirregomezkorta, Cristina Conde, Josu Figueiredo, Unai Usatorre, Itziar Aldalur, Aitor Barrutia, Ane Astigarraga, Larraitz ZIaltzeta, Ikuska Uriguen, Ane Espilla eta Nerea Asenjo. Arkabuzero lanetan aldiz, honako laukotea arituko da: Ion Arrieta, Rafa Iturrino, Iñaki Gil eta Eire Vila.

Baina dantzariez gain, ezingo genuke hau aurrera eraman musikaririk gabe, eta auren honeko hauek izango ditugu gurekin: José Ignacio Sarasua, Juan Karlos Larreategi, Andoni Urbieta eta Aintzane Larreategi, txistu lehenengoak, Itziar Goñi, Eneko Lasuen, Olatz Arriola eta Itziar Korta, txistu bigarrenak, Iñigo Legorburu eta Imanol Barrenetxea silbotearekin, eta Iñaki Goñi atabalarekin.

Ohi bezala 11:15etan ekingo diogu lanari, udalbatzari zubia eginaz. Jarraian Meza izango da Parrokian ezpata txikien emanaldi eta guzti, eta hura bukatzean ezpata luzeak heldu eta eliza atarian dantzatu ostean kalean behera joko dugu ohiturazko ibilbidean: Kalegoen plazatik abiatuz San Bartolome kalean barrena Kalebarren plazaraino, han bigarren ekinaldia burutzeko. Ondoren Errosarioko kalera joko dugu Ama Birjinaren aurrean dantzatu eta udaletxean bukatzeko.

Gonibdatuta zaudete beraz guztiok gurekin batera gozatzera, eta baita amaierako pasta eta ardo goxoz osatutako mokadutxora ere.

Nork: Haritz.2013/10/02 16:19:25.213012 GMT+2
Etiketak: | Permalink | Erantzunak (0) | Errenferentziak: (0)

2013/09/03 16:12:22.630411 GMT+2

Igartzako dantzarien eguna

Duela hilabete batzuk Beasaindik dei bat jaso eta Errosarioko Amaren ezpata-dantza bertara eramateko gonbidapena iritsi zitzaigun. Ezin ezetzik esan Aurtzaka dantza taldeko lagunei, beraz, larunbat honetan, irailak 7 Igartzako jauregiaren ondoan dantzatuko dugu.

Igartzako dantzariak (Iñaki Erauskinen argazkia).

Igartzako dantzariak eta Elgoibarko kofradiakoak batera arituko gara dantzan. Udaletxetik abiatuko gara bi taldeak, bata bestearen atzetik, bakoitza bere erritmo eta ezpata-dantza kaleratuz.

Igartzako dantzariak (Iñaki Erauskinen argazkia).

EGITARAUA:

12:00 Segizioa Beasaingo udaletxetik Igartzaraino.

12:30 Ezpata-dantzen saioa Igartzan.

          Errosarioko Amaren ezpata-dantza

13:30 Sagardoa kupeletik

14:30 Bazkaria Igartza Jauregian.

18:30 Erromeria Aiko taldearekin.

Nork: Haritz.2013/09/03 16:12:22.630411 GMT+2
Etiketak: | Permalink | Erantzunak (0) | Errenferentziak: (0)

2013/08/25 15:44:45.471401 GMT+2

Apur batean soka-dantza

Abuztuaren 22an, Elgoibarko San Bartolome jaiak ate joka genituela, herriko argazkilaria den Iñaki San Martin "Soarte"-ren Apur baten soka-dantza erakusketa inauguratu genuen. Aurten Haritz dantza taldeak 40 urte betetzen ditu, eta Elgoibarko soka-dantzari buruzko lan sorta hau gure ospakizunen barruan sartu nahi izan dugu.

Erakusketa, abuztuaren 22tik irailaren 6a arte egongo da zabalik Elgoibarko Kultur Etxean, arratsaldeko 18:30etatik 21:00etara.

Erakusketaz gain, rifak ere egongo dira salgai Kultur Etxean. Dantzan.com-en aldeko rifak izango dira. Duela hilabete batzuk, dantzan.com-en aldeko babesle kanpaina bat abiatu zen. Soartek, kanpaina honekin bat egin eta bere kuadroetako bat emango du. Rifak euro baten truke erosi ahal izango dira, eta irabazleak, erakusketan dagoen kuadro bat aukeratu ahal izango du.

Animatu batetik, dantzan.com-en alde egiten, eta bestetik Kultur Etxera hurbildu eta San Bartolome eguneko soka-dantza ardatz duen Soarteren lana ikusten.

Nork: Haritz.2013/08/25 15:44:45.471401 GMT+2
Etiketak: | Permalink | Erantzunak (0) | Errenferentziak: (0)

2013/07/16 00:41:20.450541 GMT+2

Perutik Kanadara, Amerikar folklorea protagonista

Uda beteko berotan sartuta eta dantza-denboraldia bukatzear den honetan topera martxan dabil Haritz euskal dantzari taldearen motorra. Entseguetan izerditan, arropak prest, kartelak kalean. Urteroko zita garrantzitsuenetakoa dugu Elgoibarko Nazioarteko folklore jaialdiak, eta Amerikar kontinenteko dantza taldeak izango ditugu protagonista 27. edizio honetan. Uztailaren 24an izango da, asteazkena, gaueko 22:30etan Olaizaga kiroldegian.

Bi konpainia handirekin batera jardungo dugu Haritzeko dantzariok: batetik Ipar Amerikatik, Kanadatik hain justu, Ensemble Folklorique Mackinaw izango dugu ikusgai; eta hegoaldetik berriz Peruko Jallmay. Bertako aniztasuna eta aberastasuna nabarian geratuko zaizkigu beraz, Kiroldegiko oholtzan beste behin.

Mackinaw - Kanada

Konpainia hau1974an sortu zen , Actoneko Tovarich eta Drummondvilleko Alunelul folklore-taldeen elkartzetik. Azken horretan du egoitza, Quebec erdialdean, eta folklore tradizionalaren berreskuratze eta mantentze lanetan dihardu esperientzia handiko giza-talde baten zuzendaritzapean. Taldearen izena, Mackinaw, antzina basoan lanerako erabili ohi zen jaka gorri eta beltzetik dator. Quebectar dantzen errepertorio zabala aurkezten du, eta dantza eta antzerki-izaera uztartzen ditu.

Jallmay - Peru

Jallmay (kitxueraz "lurra lantzea") kultur-elkartea 1996an sortu zen Peruko kultur aniztasuna sustatu eta ondare materiagabea gordetzeko asmoarekin. Izan ere, Peruko topografiaren ezaugarriek eskualde bakoitzean eta zenbait kasutan herri bakoitzean bertako dantzak garatzea ekarri zuten, sekulako ugaritasuna lortuz. Jallmay elkartearen ikuskizunek, beraz, Peruko aniztasuan harrigarriaren irudi zehatza eskaintzen dute: horretan datza beren originaltasunaren funtsa.

Haritz EDT - Euskal Herria

Haritzek 40 urte betetzen dituen honetan, Elgoibarko Nazioarteko Folklore jaialdiaren XXVII. edizioari ekingo diogu. Oraingoan Nafarroako dantzak taularatuko ditugu. Lehen zatian, gizon-emakumeen inguru irekiko dantza den Erronkariko Ttun-ttuna, Baztango zortzikoa, eta Iturengo soka-dantza izango ditugu ikusgai.

Bigarren zatian berriz, Behe Nafarroara jauzi egingo dugu, Luzaideko dantza koloretsu eta alaiak eskainiz. Urtero pazko-igandez antzezten den inauteria aurkeztuko dugu, kontradantzak, jauzia, sorginak eta euskaldunak, kadrillea eta dantza luzea eskainiz besteren artean.

Txankakua merkataritza elkarteko dendetan salgai daude dagoeneko jaialdirako sarrerak: 5 euro ordaindu beharko dute helduek, eta 3 euro berriz jubilatuek, 14 urtez azpikoek eta gazte txartelaren jabe direnek. Dena den, nahi duenak egunean bertan ere izango du sarrerak erosteko aukera, kiroldegiko lehiatilan bertan, amaieran Txankakuaren eskutik egingo den zozketan parte hartzerik izango ez duen arren.

Horra, bada, munduko folkloreaz gozatzeko aukera, baliatu dezagun Peru eta Kanada (eta Euskal Herria) dantza eta musikaren bitartez apur bat gehiago ezagutzeko dugun aukera paregabea.

Nork: Haritz.2013/07/16 00:41:20.450541 GMT+2
Etiketak: | Permalink | Erantzunak (0) | Errenferentziak: (0)

Kontagailua: | Ikusi estatistika osoak