Ezpalak dantza jaialdia

Iruñeko Duguna eta Eibarko Kezka dantza taldeek eta Iparraldeko Dantzarien Biltzarrak antolatzen duten Ezpalak jaialdia gai baten inguruan egituratzen da urtero. Hauek dira aurreko urteetako gaiak:

• 2006: Ezpata-dantzak
• 2007: Makila-dantzak
• 2008: Arku-dantzak
• 2009: Karaktere-dantzak
• 2010: Dantza-jauziak
• 2011: Bikoteko dantza soltea
• 2012: Zinta-dantzak

Sei urte hauetan Ingalaterra, Flandria, Frantzia, Portugal, Katalunia, Valentzia, Gaztela, Galizia, Kanariak eta Euskal Herriko dantzak ikusteko aukera eskaini du Ezpalak jaialdiak. Baina euren arteko aldeak baino gehiago, kultura koreografiko horien guztien arteko antzekotasunak nabarmentzeko ahalegina da Ezpalak. Izan ere, folkloreak herrien arteko loturak aspaldikoak direla erakusten digu, eta dantza tradizionalak Europako eskualdeen arteko trukea frogatzeko era hobezina dira.