Dantzan Ikasi

Dantzaren irakaskuntzan dihardutenentzat lagungarri izan daitezkeen hainbat ekarpen, gako eta gogoetak eskaini ditu Aiko taldeak abenduaren 28an, 29an eta 30ean, Donostian, Victoria Eugenia Antzokiko dantza-gelan eskainitako ikastaroan. "Dantzaren mugimendua eta erritmoaren pedagogia" izenburua zuen ikastaroak, baina Sabin Bikandi, Larraitz Artetxe eta Patxi Labordak maisuek dantzaren mugimenduaren analisi eta erritmoaren oinarri batzuek azaltzeaz gain, dantza eskoletarako hainbat gomendio, estrategia eta aukera desberdin aurkeztu zituzten, eta dantzaren mundua ulertu, bizi eta gozatzeko beste hainbat gogoeta eskaini dituzte.



Dantza klasean erritmoak lantzeko eta mugimenduak modu samurrean transmititzeko sistemak landu dira ikastaroan. Dantza mugimenduetan oinarrizko sistema eta beren ezaugarri erritmikoak identifikatzen ikasteko tresnak eskaini dituzte, eta apaindurak eta oinarriak bereizitako, horiekin jolasteko estrategiak aurkeztu dituzte. Bikoteko dantzak (pasodoble, bals, mazurka edo jotak), soka-dantzak edo jauziak erabili dituzte sistemak ulertu eta tresna pedagogikoak garatu ahal izateko.



Dantza irakaslearen jarduerarako musikaren ezagutzak duen garrantziaz ohartarazteaz gain, dantzarako jotzen duen musikariak dantza ezagutzeak duen garrantziaz ere aritu dira.



Etengabeko formazio eta ikasketa batean aritu beharra, eta errepertorioaz haratago, dantzaren oinarriak eta prestakuntza teorikoak sendotu beharra trasnmititu dute Aiko taldeko irakasleek.

• Dantzan Ikasi: Aiko taldearen ikastaroa [argazkiak]